Blog Poetry

دولتِ دہر سب لٹائی ہے

دولتِ دہر سب لٹائی ہے
میں نے دل کی کمائی کھائی ہے
ایک لمحے کو تیر کرنے میں
میں نے اک زندگی گنوائی ہے
وہ جو سرمایہء دل و جاں تھی
اب وہی آرزو پرائی ہے
تو ہے آخر کہاں کہ آج مجھے
بے طرح اپنی یاد آئی ہے
جانِ جاں تجھ سے دو بدو ہوکر
میں نے خود سے شکست کھائی ہے
عشق میرے گمان میں یاراں
دل کی اک زور آزمائی ہے
اس میں رہ کر بھی میں نہیں اس میں
جانیے دل میں کیا سمائی ہے
موجِ بادِ صبا پہ ہو کے سوار
وہ شمیمِ خیال آئی ہے
شرم کر تو کہ دشتِ حالت میں
تیری لیلیٰ نے خاک اڑائی ہے
بک نہیں پارہا تھا سو میں نے
اپنی قیمت بہت بڑھائی ہے
وہ جو تھا جون وہ کہیں بھی نہ تھا
حسن اک خواب کی جدائی ہے

Ready to get started?

Are you ready
Get in touch or create an account.

Get Started